Editorial

Gamchata on·ani

M.K.Marak

Ring·rang ring·rang ching·chetchet rama-dilman’ bolrang;  songsongantio kona-noksiko  gapaha katchaan’ ring·an’ ku·rangrang. Bari-bagan rongtaljok noka-jama chijengjok. Sowek-dimek gimajok balwan’ biba dingtangjok.  A·wek-chiwek donnujok mikka bitchi ran·tokjok songni rama an·sengjok. Bi·sa-desa katchajok dimdim-damdam dokatjok songni dama ong·katjok. Manden’ mikkang-bimango nika kusi katchaan’ gisikko. Anti-bajaro wekwak-chekchak bring-biktip pala-sim·a dandak. Wetwat-setsat re·ana manden’ ja·ku-ja·bina kimil-mil·mil a·dumi dimpang mikmik-makmak baldoe gingsika dimak-mikmak. Nika manden’ bewalo wikwik-sitsit krengako. Rike sal-somoina miksonga kam-jamko matchotna. Bilsin’ gisep changsa kusi ong·e manina Jokatgipa Kristo Jisuni atchiani ! Katchi nikgiparangchi Isol Jihovani agansogimin ku·rachakaniko be·en pil·atania namen dal·bea patiani aro katchaani ong·chongmata. Maina papko watanina  Kristo Jisu mandeni bimango an·tangko onatbee atchiaha ine nikna ama. Sastroo mesoka – “Chubatao Isolna rasong, Aro a·gilsako namnika manderangna tom·toma.” (Luk 2:14) ine sa·grerang baksa salgini kotok jinma Isolko mitele aganprakaha.

  Ia chu·sokatgimin kam Ku·rachakatangko Rakkigipa Isolna aro Uni segimin mande Mariam aro Josepni dal·bea on·kanganiko on·na nangaha. Ia gamchatbea on·anniko be·enpilatanio baditana rakbegipa ong·enggenchim; jeon, Isol an·tangni saksa kam·kam Depante Kristo Jisuko Adamni dedrangko piokani ba pap watanina chisol sichakana watatna nangaha. O ! Maironggipa  on·kangani ! Oe, ku·chakatangko chu·sokatanio namen katchaani donga. Indiba U·igimalgipa Isolna an·tangni saksa kam·kam Depante Kristo Jisuko chisol papi mandena sichakna watatani badita rakbegipa ong·achim. Ian maironggipa Isolni mandena ka·saako dakmesokani ong·a. Aro, Isolni ia gamchata on·anio Mariam aro Josepba dal·bea on·kangani aro an·tangko Isolna bamataniko dakmesokaha. Sastroo agana – “Maina Isol a·gilsakna inditan ka·saaha, Ua an·tangni saksa kam·kam Depanteko on·jok, maikai Uo bebera·gipa sakanti gimagija jringjrotni janggiko man·gen.”(Johan 3:16). Na·a janggiko man·ahama?

Kristo Jisuko a·gilsakona watatanio Isolni dal·bea aro gamchatbea on·aniko chu·sokatna, jekai Mariam aro Josep an·tangtangko bamate Isolni ge·etako ra·chakaha gita nang·ni aro angni on·kanganiko nanga. Pilak on·ani jeko jena miksonga ua kam chu·sokna gita minggniko nanga. Skanggipao, Ka·sae On·gipako. Gnigipao, ka·sae on·aniko mandera·e aro gamchatnike Ra·chakgipako nanga. On·aniko ra·chakgnigipa ra·chakna jechakode pilak on·anirang jegitaba gamchatbegipa ong·china ua jeko jena miksonga uko chu·sokatna amja. Ka·saan Suakgipa Isol Kristo Jisuko nang·na aro angna on·aha. Indiba ia gamchatbea on·aniko nang·ni ba angni ra·chakani dongjaode ian  ong·gramanisan ong·aia. Isolni on·ani chu·sokgipa ong·oba mande uko jegale ra·chakna simsakjaode Isolni miksonga jegalenggipa mandeo chu·sokna amja. Nang·ni janggi tanganio maikai ong·enga ? Ra·chakani aro jegalani nang·ni an·tangni jakgitele see ra·ani ong·a. Darangba sakgipinko uni on·aniko ra·chakna drana gita amja. Indiba Isolni kattao mikrakatania ian – “Uo bebera·gipako bichal ka·ja; bebera·gijagipako da·oba bichal ka·aha, maina ua Isolni saksa kam·kam Depanteni bimungo bebera·jaha.” (Johan 3:18). Na·a an·tangni janggi tanganiko namedake sandie nibo. Bebera·anio ma bebera·gijanio ong·enga. Bebera·giparangna ku·rachakani ian – “Depanteo bebera·gipa jringjrotni janggiko man·a; indiba Depanteko bebera·gijagipa janggiko nikjawa, batesa Isolni ka·onanga uni kosako donga,”(Johan 3:36). Na·a maiko see ra·gen – Isolni on·a janggiko ma Isolni bichal ka·aniko ! 

Isolni on·ani indin ong·a indiba jakgitele ra·chakani nang·ni kam ong·a. Kristo Jisuni atchianiko gisik ra·e manieba Kristo Jisuko ra·chakna gualode nang·ni maniao janggina mai namgni dongkua ! Unigimin, bebera·e Isolni on·aniko ra·chake jringjrotni janggiko see ra·bo – “Indiba badita mande Uko(Jisuko) ra·chakaha, ua uamangna, Isolni de ong·china bil on·aha.” (Johan 1:12). Kristo Jisuni a·gilsakona mande gita re·baani bebera·gipa sakantina janggiko on·na ong·a. Mandeni pilak jotton ka·ani aro pilak a·gilsakni bewalrangchi Kristo Jisuni atchianiko gisik ra·e manianio janggina mamung namgni gri. Maina uarang pilakan mandeni gita aro a·gilsakni gitasan ong·a. Unigimin Sastroo rongtalbee mesoka – “Depanteko man·gipa janggiko man·aha, aro Isolni Depanteko man·gijagipa janggiko manja.” ( I Johan 5:12). Na·a Isolni Depante Kristo Jisuko man·ahama ? 

Kristo Jisuni atchiani salko gisik ra·engon ia gamchatbegipa Isolni on·gimin Depanteo jringjrotni janggiko see ra·na gualjana. Isol Gisik Rongtalgipa sakanti bebera·giparangna gisiko tom·tomani aro katchaaniko patichina. Poraisoenggipa sakantina Merry Krismas aro Gital Bilsa nam·a chu·sokaniko ra·bachina. AMEN.

Gamchata on·ani chamgija janggi

Kristoo bebera·ani dakgni angni

Gisik gnange see ra·ani

Jringjrotni janggi mandeni.