Books

              

  Ka·gipa Chi

Israelrang ka·gipa chiko namen namnikja, indiba uamang an·tangtangni nangnikgijagipa obostakon chagrongna nangaha. An·chingba bang·a nangnikgijagipa obostarangko an·chingni janggi tanganio chagrongronga. Uarang an·chingna ka·gipa chirang gita ong·a. Ia ka·gipa chio an·ching an·tangtangko Isolni namnikaniona ra·bana man·ode uarang baten an·chingni salgiona sokaniko tarakbatatgen. Indiba jemangan Isolni skana bamatna man·jaha uamang Israelrang gitan gimanaba donga. Uni gimin an·ching ia ka·gipa chio katong tangtangko nipilna aro Gitelna bamatsrangna jedakode an·ching salgiko gimaatjawa.

Uni gimin an·ching katchamitingon ka·gipa china tarisona aro chagrongahaon antangko nipilna aro Gitelni skana bamatna. Isol nang·na pattichina. 

Sunmith .G. Momin

Pangkamgipa Singhason

Ia chongipa kitap A·chik Evangelical Association (AEA)-ni nakatatenggipa ong·a. Ian maiba mingsa dingtang katta bichongni gimin seanide ong·ja, indiba jerangko AEA-ni Chibasal Magazine-o article seahachim, uarangoniko chimonge dingtang dingtang katta bichongrang ong·oba damsan ka·dimanisan ong·a. Isolni Kattako manderangni katongo tange rakkina miksonge ia kitapko chappa ka·atenga. Batanggimin Chibasal magazine-rangko bang·gija manderangsan tarie ripingronga aro uano segimin kattarangko gualronga. Minggipin, an·chingni manderang dala kitaprangko brena aro poraina gisik nangrongja, indiba dam komiani kitaprangko brena aro poraina altuae nika. Uni gimin, ia chongipa kitapko chappa ka·anichi kona noksiko donggipa bang·bata manderangona sokangna aro manderangna brena jaksokna chinga ka·dongsoenga. Na·a ia kitapko poraiengon, ia sing·anirangko chanchibewale nibo. Na·a Jisu Krstochi jokatako man·ahama? Na·a uni re·bapilanina tarie dongsoengama? Na·a uni re·bapilanina tarie dongsoengama? Na·a salantio Gitel baksa re·ruraengama? Ia chongipa kitapko tarianichi Isol poraisoenggipa sakantina bang·bee pattichina!

Rev. Manhseng A. Momin.

BEBE RA·A BONAHAON

Rakbeoba Isolni kattako manianio gimani dongja

An·tangoniko on·atna ba gimaatna nanggipako bebera·ana bate an·tangna lap gnanggipako mande bebera·na altubata. Indiba an·tangoniko gimaatna nanggipako bebera·anisa dal·batgipa pattianionikode  ra·baa. Jatna a·songna aro Mondolina maiba dal·a pattianiko ra·bana inode  an·tangoni maiba gimana nanggipako bebe ra·na nangchongmotgen. Ua gimaani haida tangka paisa, gam jin ba janggi tangani gadangrang ong·oba donga. Indiba chong·mote indake gimana nanggnirangko bebera·e jensalo Isolna chadenggen Isol nang·na dobokko donsoenga. Jensalo na·a doboko nikgen unon na·a bebera·e chadengani gimaani ong·chongmotja ine nikgen......Abraham depanteko gimaatna nanggipako bebera·e chadengahaon Isol una dobokko donsoaha. Indake uni depanteni gimaaniko bebe ra·e chadenganio uni depante gimana nangjaha batesa chansokgija pattianirangko uni kosakona watataha. (Aba 22:15-18)

Sunmith G. Momin